山上風景優美，大家心情絶好，和兒子邊行邊聊，南北西東，談得很投契。

對談節錄：

兒：點解啲人唔想窮？

我：你嘅意思係啲人想發達想好有錢？

兒：無錢都可以生存到的。

我：無錯，呢個問題我也有想到，睇吓我同爸爸種咗咁多菜，我地差不多半年未買過菜，就算無錢都唔會餓死。

兒：做流浪漢幾好，做乜都得，幾自由呀！

我：你好想做流浪漢咩？

兒：佢地好似乜都唔駛做便可以生存，但係我就要做咁多嘢。呢個世界唔可以簡單啲咩？

我：你有幾多嘢要做呢？踢足球、彈琴、彈結他、畫畫都是你喜歡的。

兒：仲有番學，番學好儍！學埋啲無謂嘅嘢！

我：咁學校應該教什麼？

兒：煮飯、野外求生、睇好嘅電影、聽好歌，仲有最緊要嘅運動。

我：即係教你有興趣嘅嘢！

兒：仲有耕田！

我：耕田？叫你去花園幫手慘過叫你番學！

兒：學咗耕田第二時唔駛番工都可以養到自己。

我：啱！

兒：我可唔可以殺一個人？（嚇得我！）

我：無緣無故你做乜去殺人？

兒：如果嗰個人想我殺佢呢？

我：佢做乜要你殺佢呢？

兒：唔知，但係如果我地寫清楚，係佢要我幫佢呢？

我：即係有合約啦，但喺好多地方就算有合約都要坐監架！

兒：但我係幫人！

我：乜嘢人要你幫忙吖？

兒：好慘嗰啲。

我：點慘法？

兒：慘到想死嗰啲。

我：例如邊啲人會慘到想死呢？

兒：病得好慘嗰啲。

我：咁即係安樂死？

兒：點解我咁懶嘅？

（乜你都知自己懶咩？）

我：你都唔懶，打波唔駛叫你識得晨咁早起身，彈琴、彈結他從來未試過走堂或遲到。

兒：但係點解我係學校咁懶嘅？

我：危急關頭你就唔會懶啦！你睇舊年你拉丁文唔及格要補考，仲考個 B 番嚟，即係代表你唔蠢！

兒：學校分數好唔代表聰明㗎！而且好傻，暑假我用三個星期就可以讀好拉丁文，但係同樣嘅嘢就要番成年學去學！好嘥時間！

我：咁用三個星期嘅時間去温成年嘅書，辛唔辛苦吖？

兒：梗係辛苦啦！不過我寧願咁！

我：唉！

兒：我其實幾聰明㗎，因為我知道自己蠢。

我： …………………….

兒：我想做樹懶呀！

我：今世唔得嘞，留番第二世啦。

兒：我連買薯條都唔敢叫要Kettchup，咁第二時遇到個鍾意嘅女仔點同佢講呀？

我：食薯條無Kettchup係無咁好味啫，都仲可以食，但係遇到一個你好鍾意嘅女仔，見少一秒都好痛苦，唔想痛苦就要主動出擊。

兒：唔好嘞，都係由得啲女仔主動追我好啲。

我：萬一追你嗰啲唔係你喜歡嘅呢？

兒：我會比啲提示我鍾意嗰啲。

我：咁祝你好運嘞！